18–19 сентябрь кунлари Фарғона давлат университетида Ўзбекистон Республикасининг Биринчи Президенти Ислом Каримов хотирасига бағишланган анъанавий «Ислом Каримов ўқишлари» доирасида «Мустақиллик йилларида Ўзбекистон маданияти: тарихий мерос ва маданий юксалиш» мавзусида республика илмий анжумани ўтказилди.
Тадбир доирасида «Мустақиллик одимлари: маънавий юксалиш йўлида» китоб ва фото кўргазмаси очилди. Анжуманда тарихий мерос, мустақиллик йилларида илм-фан, олий таълим ва маданият ривожига оид мавзуларда маърузалар тингланди.
Анжуман ишида олимлар, профессор-ўқитувчилар, талабалар, журналистлар ва соҳа вакиллари иштирок этди.
Анжуманнинг президиумидан Ислом Каримов номидаги илмий-маърифий ёдгорлик мажмуаси Васийлик кенгаши аъзоси, Ўзбекистон Республикасининг Биринчи Президентининг рафиқаси Татьяна Каримова, мажмуа раҳбари — тарих фанлари доктори, профессор Темир Ширинов, Фарғона давлат университети ректори, педагогика фанлари доктори, профессор Баходиржон Шермуҳаммадов ҳамда вилоят ҳокими ўринбосари Шерзод Полвонов жой олди.
Тадбирда Ислом Каримов ҳақида хотиралар айтилди. Иштирокчилар у киши билан боғлиқ хотираларини сўзлаб берди. Якунда иштирокчилар Татьяна Каримова билан эсдалик учун суратга тушди.
Анжуманнинг кейинги қисмлари шўъба йиғилишларида давом эттирилди.
«Ислом Каримов ўқишлари» анъанаси 2019 йилда илк бор Самарқандда ўтказилган республика илмий анжумани билан давом эттирилган. Ўзбекистон Республикаси Вазирлар Маҳкамасининг 2019 йил 25 февралдаги фармойиши асосида ташкил этилган ушбу анжуман кейинги йилларда бошқа ҳудудларда ҳам ўтказилди. Жумладан, 2022 йилда тадбир Қашқадарё вилоятида, шунингдек, Қарши давлат университетида ташкил этилди.
