birinchi-prezident.uz

Бобомиз номини абадийлаштириш таклифи

«Халқимиз Соҳибқирон бобомизнинг буюк бунёдкорликларини англаб, шундан маънавий куч-қувват олса, дунё жамоатчилиги Амир Темурни нафақат энг қудратли давлат асосчиси, балки илм-фан, маданият ва маънавият ҳомийси, ўз вақтида Осиё ва Европа қитъаларида рўй берган тарихий ўзгаришларга ҳал қилувчи таъсир кўрсатган буюк шахс эканини билса, тарихий адолат қарор топар эди» дея, Президентимиз бу борада уч ғояни таклиф этди: халқаро ҳамжамиятга Амир Темурнинг бунёдкорлик фаолиятини танитиш, Халқаро Амир Темур жамғармасини тузиш, Соҳибқирон ва темурийлар даврини акс эттирган музей барпо этиш.

Наврўз — қадимий ва боқий байрам

Ислом Каримов ташаббуси ва жасорати билан ҳали мустабид тузум ҳукмрон бўлиб турган даврда Наврўз байрами қайта тикланди. Президентимизнинг 1990 йил 3 майдаги фармонига мувофиқ Наврўз умумхалқ байрами, 21 март дам олиш куни, деб эълон қилинди. 1991 йил 12 февраль куни эса Республикада Наврўз умумхалқ байрамига тайёргарлик кўриш ва ўтказиш ҳақида ЎзССР Биринчи Президенти Ислом Каримовнинг Фармони эълон қилинди.
Ўтган йилларда Наврўз мазмунан янада бойиди, халқимизнинг қадим маданияти, эзгу фазилатлари тимсолига айланди.

Ниҳоят қанча-қанча замон бўҳронларидан омон ўтган Наврўз Ватанимизда умумхалқ байрами сифатида кенг нишонлана бошлади.

Биз кутган кун

1991 йилнинг 31 август куни Ўзбекистон ССР Олий Кенгашининг олтинчи сессиясида Ислом Каримов тантанали равишда Ўзбекистон Республикаси мустақиллигини эълон қилди.

Мустақил давлат тузиш онларига етиб келганимиз, авваламбор, асрлар давомида буюк истиқлолнинг машаққатли йўлида халқимизнинг асл фарзандлари тинимсиз олиб борган курашлар натижасидир. Бунинг учун Александр Македонскийга қарши курашган Спитаменни, араб босқинчилари билан олишган Муқаннани, дунёнинг ярмини истило қилган мўғул босқинчиларига қарши жанг қилган Жалолиддин Мангубердини, мўғулларни юртимиздан ҳайдаб чиқариб, дунё халқларини бу зулмдан қутқариб қолган буюк бобомиз Амир Темурни эслашнинг ўзи кифоя.

Мустақиллик ўзлигимизни англаш бахтини берди

Президент Ислом Каримов «Юксак маънавият-енгилмас куч» китобида «…ўз тарихини билмайдиган, кечаги кунини унутган миллатнинг келажаги йўқ», деб ёзади. Зеро, халқимизнинг фожеали ўтмиши, босиб ўтган машаққатли йўли барчамизга сабоқ бўлиши, бугунги воқеликни теран таҳлил қилиб, мавжуд таҳдидларга нисбатан огоҳ бўлиб яшашга даъват этмоқда.

Мустақилликка эришганимиздан сўнг мамлакатимиз тарихида катта ўзгаришлар бўлди. Ўз қадр-қимматимиз, миллий давлатчилигимиз, маданиятимиз, муқаддас қадриятимиз, тилимиз билан, ягона халқ, ягона миллат бўлиб жаҳон ҳамжамиятида муносиб обрў-эътибор қозонишга эришдик.

Эътироф

Мустақиллик йилларида Ўзбекистон темир йўллари тизимида «Афросиёб»-замонавий тез юрар поезди ишга туширилди. Япония халқаро банки билан ҳамкорликда узунлиги 223 километр бўлган, денгиз сатҳидан 1500 метр баландликдаги довон орқали ўтадиган, Афғонистоннинг шимолий ҳудудларига чиқиш имконини берадиган Тошгузар-Бойсун-Қумқўрғон янги темир йўли барпо этилди. Навоий-Учқудуқ-Султон Увайстоғ-Нукус йўналиши бўйича  барпо этилган автомобиль ва темир йўл кўприги, Фарғона водийсини мамлакатимизнинг бошқа туманлари билан бирлаштирадиган, халқаро андозаларга жавоб берувчи Қамчиқ довони орқали ўтадиган туннель Марказий Осиёни Хитой билан боғлашга ва транзит соҳасида имкониятларни очиб беришга хизмат қилмоқда.

Қўшнинг тинч-сен тинч

Ўзбекистон мустақилликка эришган биринчи кунларданоқ «Қўшнинг тинч-сен тинч» деган азалий халқ ҳикматига амал қилиб, афғон можаросини тинч йўл билан ҳал этиш ҳаракатида бўлиб келаётанлиги, бу борада давлатимиз раҳбарининг нуфузли халқаро минбарлардан туриб такрор ва такрор жаҳон ҳамжамиятига мурожаат қилганлиги барчага маълум. Афғон можароси 1978 йилдан бошланган бўлса, орадан 40 йил ўтди. Юртбошимиз 1993 йилда БМТ Бош  Ассамблеясининг 48-сессиясида Афғонистон можаросини жаҳон ҳамжамияти билан ҳал этишга чақирди. 1997 йили мамлакатимиз раҳбари афғон муаммосини ҳал қилиш учун «6+2» мулоқот гуруҳини ташкил этиш ташаббуси билан чиққани ва 1999 йили мазкур гуруҳнинг Тошкентда учрашуви бўлиб ўтганидан барчамиз хабардормиз.

Ўзбекистон – келажаги буюк давлат!

Яхши эслаймиз, мустақилликка эришиш арафасида давлатимиз биринчи раҳбари Ўзбекистоннинг истиқбол йўлини белгилаб берар экан, «Ишонинглар, Ўзбекистоннинг келажаги албатта буюк бўлади!» деган даъваткор сўзларни айтганларида, бундай улуғ мақсадга шубҳа билан қараганлар ҳам бўлди. Мана, бугун бу даъват ҳаётимизнинг барча соҳаларида ўз ижобатини топганини ким инкор эта олади?

Буни ҳаётимизнинг барча жабҳаларида, одамларимиз қалбида, онгу шуурида намоён бўлаётган меҳр-оқибат, мурувват, бағрикенглик каби инсоний фазилатлар ва юртдошларимизнинг эртанги кунга кучайиб бораётган ишончи тўла тасдиқлайди.

Болалар спорти

Биринчи Президентимиз таъкидлаганидек, спорт нафақат жисмоний, балки маънавий камолотга эришишда ҳам муҳим омилдир. Кадрлар тайёрлаш миллий дастурининг узвий ва муҳим бўлаги ҳисобланган уч босқичли спорт тизими-«Умид ниҳоллари», «Баркамол авлод» ва Универсиада мусобақалари халқаро майдонларда Ўзбекистон байроғини баланд кўтарадиган, юрт шаъни, халқ ғурури учун курашадиган фидойи спортчиларни тарбиялашда мактаб вазифасини ўтамоқда.

Таълим-тарбия соҳасида:

Мамлакатимизда ёш авлод камолоти йўлида амалга оширилаётган салмоқли ишлар, хусусан, минглаб мактаб, лицей ва коллежлар қурилгани, реконструкция ва таъмирдан чиқарилгани, замонавий ўқув воситалари ва жиҳозлари билан таъминлангани, болалар спорти мажмуа ва иншоотлари барпо этилгани, узоқни кўзлаб қилинаётган бу ишлар изчил давом эттирилаётгани ана шу фикрнинг ёрқин тасдиғидир.

Биринчи Президентимиз ташаббуси билан «Кадрлар тайёрлаш миллий дастури»нинг мантиқий давоми сифатида «2004-2009 йилларда мактаб таълимини ривожлантириш Давлат умуммиллий дастури» ишлаб чиқилиб, ҳаётга изчил жорий этилганлиги бу соҳага бўлган эътиборнинг амалий ифодасидир.

Ташаббус ва ғоя

Биринчи Президентимиз қишлоқ аҳоли пунктларини комплекс равишда ривожлантириш ҳақида тўхталар экан, энг аввало, одамларнинг турмуш тарзи ва менталитетини ўзгартиришга хизмат қиладиган замонавий муҳандислик, транспорт ва ижтимоий инфратузилмага эга бўлган янги ва кўркам уй жойлар мавзелари барпо этиш кўламини кенгайтириш зарурлигини таъкидлайдилар.

Шундан келиб чиқиб, ҳар йили республикамизниинг чекка ҳудудларида кўплаб замонавий мавзелар барпо этилиб, янги турар-жойлар табиий газ, ичимлик суви, электр энергияси билан тўлиқ таъминланяпти. Йўлларга асфальт ётқизилиб, транспорт ва коммуникация хизматлари йўлга қўйилмоқда.

Эътибор

Тиббиёт ходимларининг шарафли ва масъулиятли меҳнатини эъзозлаш, самарали фаолият юритиши учун зарур имкониятлар яратиш доимий эътиборда.

Биринчи Раҳбаримиз Ислом Каримов ташаббуси билан 2006 йил 12 сентабрда қабул қилинган тиббиёт ходимлари кунини белгилаш тўғрисидаги Ўзбекистон Республикаси қонуни бунинг ёрқин далилидир.

Мазкур қонунга мувофиқ юртимизда ҳар йили ноябр ойининг иккинчи якшанбаси шифокорларнинг касб байрами сифатида кенг нишонланади.

1994 йил 16 июнь.

Ўзбекистон Биринчи Президенти Ислом Каримов «Ўзбекистон Республикасининг миллий валютасини муомилага киритиш тўғрисида» Фармон чиқарди.

Ўзбекистон Республикасининг миллий валютаси-сўм республика ҳудудларида 1994 йил 1 июлдан бошлаб муомилага чиқарилди.

Иқтисодиёт соҳасида:

Биринчи Президентимиз томонидан ишлаб чиқилган инқирозга қарши чоралар дастурини амалга ошириш, иқтисодиётни модернизация қилиш, мамлакатимиз экспорт салоҳиятини юксалтиришга алоҳида эътибор қаратилгани ўз самараларини берди.

1993 йил 24 август. Тошкентда Жанубий Кореянинг «ДЕУ» корпорацияси ва Ўзбекистон Давлат концерни «Автоқишхўжмаш» ўртасида Андижон вилоятининг Асака шаҳрида йилига 180 минг автомобиль ишлаб чиқарадиган заводни қуриш тўғрисида шартнома имзоланди.

Санъат – тинчлик элчиси

Биринчи Президентимиз Ислом Каримов раҳнамолигида асрий анъаналаримиз, муқаддас қадриятларимизни тиклаш, асраб-авайлаш, янгича мазмун билан бойитишга алоҳида эътибор қаратилди.

Нодир осори-атиқаларимиз, милодгача бўлган даврда ва ундан кейин қурилган мураккаб иншоотлар қадим-қадимдан диёримизда деҳқончилик ва ҳунармандлик маданияти, меъморлик ва шаҳарсозлик, санъатнинг рақс, томоша, мусаввирлик каби йўналишлари ривожланганидан далолатдир. Мамлакатимиз ҳудудида мавжуд бўлган тўрт мингдан зиёд моддий-маънавий обида умумжаҳон меросининг ноёб намунаси сифатида ЮНЕСКО рўйхатига киритилгани бунинг тасдиғидир.

Мустақиллик йилларида бутун тиббиёт тизими тубдан қайта қурилди

Ўзбекистон Республикаси Биринчи Президенти ташаббуси билан 1998 йилда қабул қилинган «Ўзбекистон Республикаси соғлиқни сақлаш тизимини ислоҳ қилиш Давлат дастури тўғрисида»ги Фармони мамлакатимизда бутун тиббиёт тизимини тубдан қайта қуришда, кўп сарф-харажат талаб этадиган ва ҳамма вақт ҳам самарали бўлмаган стационар тиббий ёрдамдан амбулатор-поликлиника ва профилактика тиббиётига ўтишда муҳим омил бўлди. Қишлоқ жойларида яхши самара бермаётган фельдшер-акушерлик пунктлари ўрнига қишлоқ врачлик пунктлари (ҚВП) ташкил этилди.

Эзгулик аркаси

Эзгулик аркаси 2005 йил 1 сентабрда қуриб битказилган, узунлиги 150 метр, икки томони ўн, ўрта пештоқи ўн икки метр баландликка эга, қатор кетган ўн олтита оқ мармар устунлардан иборат бўлиб, Мустақиллик майдонида жойлашган «Мустақиллик ва эзгулик монументи» мажмуасининг бир қисми ҳисобланади.

Мустақиллик ва Эзгулик Монументи – Тошкент шаҳридаги Мустақиллик майдонида Ўзбекистон Республикасининг Биринчи Президенти Ислом Каримов ғояси билан бунёд этилган меъморий – бадиий мажмуа.

Миллий ифтихоримиз тимсоли

1991 йил 18 ноябрь куни Ўзбекистон Республикаси Биринчи Президенти Ислом Каримов ташаббуси билан мамлакатимиз парламенти томонидан “Ўзбекистон Республикасининг Давлат байроғи тўғрисида”ги қонун қабул қилинди. Унда миллий байроғимиз давлатимиз суверенитети рамзи эканлиги мустаҳкамлаб қўйилган.

Ўзбекистон Республикаси байроғи ва ундаги ҳар бир ранг, ҳар бир белги мамлакатимизнинг миллий-маданий анъаналари ва табиий иқлим шароитларини ўзида мужассам этади.

Ўзбекистон Республикасининг давлат байроғи буюк ўтмишимиз, шарафли бугунимиз ва ёрқин келажагимиз тимсолидир.

Мустақиллик ва эзгулик монументи

2005 йилнинг 28 декабрида давлатимиз биринчи раҳбари Мустақиллик майдонига ташриф буюриб, бу ерда янги қад ростлаган монумент пойига гул қўйди. Ушбу яхлит обида таркибидан фарзандини бағрига босиб турган Бахтиёр она ҳайкали жой олди. Моҳиятан мустақиллик ва эзгулик тушунчаларини бири-биридан айри ҳолда тасаввур этиб бўлмайди. Она сиймоси биз учун ҳамиша меҳрибонлик, фидойилик, эзгуликнинг ёрқин тимсоли бўлиб келган. Президентимизнинг таклифига биноан, чуқур ва кенг маъно-мазмуни билан барчамиз учун азиз бўлган шу икки муқаддас қадриятни ўзида мужассамлаштирган мажмуага “Мустақиллик ва эзгулик монументи” деб ном берилишини жамоатчилигимиз, халқимиз катта хурсандчилик билан қўллаб-қувватлади.

Темурийлар тарихи давлат музейи

1996 йил 14 мартда Ўзбекистон Республикаси Вазирлар Маҳкамасининг «Темурийлар тарихи давлат музейини ташкил этиш чора-тадбирлари тўғрисида»ги қарори қабул қилингач, Биринчи Президентимиз бу музей меъморий шакли, тузилиши ҳақида меъморлар, тарихчилар, ижодкорлар ва зиёлилар билан кенгашди. Ўшанда Ислом Каримов бу музей сарой ва тож шаклини ифода этиши, мамлакатимиз архитектура санъатида дурдона асар бўлиши кераклигини айтди. Қурилиш ишлари жадал бошланди. Президентимиз бу ерга тез-тез келар, музей қурилишидаги ҳар бир деталга қизиқиб, сўраб-суриштирар ва ҳар гал унинг меъморий ечимида ҳал қилувчи фикрларни айтар эди.

Юксак самаралар

“Янги уй қурмасдан туриб, эскисини бузманг” тамойили асосида олиб борилган ислоҳотлар туфайли турли йўқотишларга йўл қўймасдан, барча соҳа мутаносиб ҳолда ислоҳ этилди ва ривожлантирилди, янги жамиятнинг мустаҳкам асослари яратилди.

Собиқ иттифоқдош республикалар орасида фақат Ўзбекистонимизда 1996 йилдан бошлаб изчил иқтисодий ўсиш суръатлари таъминланди. Агар 1996-2003 йилларда ўртача ўсиш суръати 4,3 фоизни ташкил этган бўлса, 2004 йилдан бу жараён янги босқичга кўтарилди – 7,5-9 фоиз.

Инқирозга қарши чоралар

Биринчи Президентимиз Ислом Каримов ташаббуси ва раҳнамолигида мамлакатимизда дунё давлатлари орасида биринчилардан бўлиб Инқирозга қарши чоралар дастури ишлаб чиқилиб, изчил амалга оширилди. Агар кўпчилик хорижий давлатларда қабул қилинган инқирозга қарши дастурлар кўрилган талофатларни бартараф этишга қаратилган бўлса, Ўзбекистоннинг дастури яқинлашиб келаётган хатарнинг олдини олиш ҳамда иқтисодиётни янада мустаҳкамлаш, унинг рақобатдошлигини оширишга йўналтирилгани билан ажралиб туради.

Қалтис вазият

Юртимизда 80-йиллар охирида вужудга келган вазиятни чуқур ўрганган олимлар, эксперт ва таҳлилчилар айнан ана шу иборани қўллайдилар.  Қишлоқ хўжалигида пахта яккаҳокимлиги оқибатида озиқ-овқат масаласида ўзгаларга қарам эдик.

Ислом Каримов Ўзбекистон раҳбари этиб сайланганининг эртаси куниёқ ҳукумат мажлисида республикада вужудга келган ўта мураккаб ижтимоий-иқтисодий вазиятга объектив баҳо берди ва унинг келиб чиқиш сабабларини чуқур таҳлил қилиб, шундай якуний хулоса чиқарди: “Биз бундан буён эскича яшолмаймиз ва бундай яшашга замоннинг ўзи йўл қўймайди”.

Ўзбекистоннинг ўз тараққиёт йўли

Машҳур беш тамойилга – иқтисодиётнинг сиёсатдан устуворлиги, давлат – бош ислоҳотчи, қонун устуворлиги, кучли ижтимоий сиёсат юритиш, бозор иқтисодиётига босқичма-босқич ўтишга асосланган ана шу модель бозор муносабатларига асосланган ҳуқуқий демократик давлат қуриш стратегияси сифатида барча амалий ишларимизнинг мустаҳкам пойдевори, тараққиётимизнинг асосий ҳаракатлантирувчи кучига айланди.

Ҳеч бир муболағасиз айтиш мумкинки, бу стратегия бозор иқтисодиёти назарияларини янада бойитди, ўтиш даврини бошидан кечираётган давлатлар учун яна бир намунага айланди.

Имом ал-Бухорий ёдгорлик мажмуаси

Имом ал-Бухорий ёдгорлик мажмуа пойдевори 1998 йил бошларида қўйилди ва меъморчилик тарихида ўта қисқа муддат-8 ойда қуриб битказилди: 1998 йил 23 октябрь, жума куни очилди. Ёдгорлик мажмуининг бош режаси Биринчи Президентимиз Ислом Каримов раҳбарлигида яратилган лойиҳа асосида Самарқанд, Бухоро, Хива, Тошкент, Андижон, Наманган, Қўқон, Шаҳрисабз халқ усталарининголтин қўллари билан барпо этилган.

Бу муаззам ёдгорлик мажмуаси, Ўзбекистон Республикаси Биринчи Президенти Ислом Каримов таъкидлаганидек, шунчаки зиёратгоҳ эмас, балки у бундан буён ҳам гўзал юртимизни бутун дунёга танитадиган, ёш авлодни эзгулик руҳида тарбиялайдиган, ҳар бир инсонни ҳаёт ва абадият ҳақида ўйлантирадиган азиз маскан бўлиб қолади.

Ўзбекистон ғалла мустақиллигига эришди

Ўз вақтида давлатимиз биринчи раҳбари Ислом Каримов томонидан юритилган оқилона сиёсат туфайли Ўзбекистон ғалла мустақиллигига эришди.  Бу аввало, ҳар қандай шароитда ҳам халқимизни нон ва ун, гўшт ва сут маҳсулотлари билан таъминлаш имконини бермоқда. Таққослайлик, агар 1989 йилда республикамиз бўйича бор-йўғи 750 минг тоннага яқин дон етиштирилган бўлса, 2011 йил 1 январь ҳолатига келиб Ўзбекистонда 8 миллион тоннага яқин дон маҳсулотлари ҳосили олишга муваффақ бўлинди. Бугунги кунда Ўзбекистон ғалла маҳсулотлари экспортига ҳам эришди.

Эй, улуғ Ўзбекистоннинг навқирон авлоди!

Юртбошимиз бугунги кун ёшларининг маънавий ҳаёти, ижтимоий фаолиятини белгиловчи мезонни шундай таърифлаб берган эди: «Эй, улуғ Ўзбекистоннинг навқирон авлоди! Сизнинг бу ҳаётда орзу-интилишингиз, кўзлаган мақсадингиз, қиладиган ишларингиз кўп. Лекин, ҳеч қачон унутмангки, сизнинг энг буюк, энг муқаддас вазифангиз юртимиз истиқлолини, халқимиз эрку озодлигини кўз қорачиғидай асраш, унинг хафсизлигини ҳимоялашдир!»

Абу Мансур ал-Мотуридий мақбараси

2000 йил Ўзбекистонда олим ва файласуфнинг 1130 йиллик юбилейи кенг нишонланди. Ал-Мотуридий илмий меросини ўрганиш мавзусида ўтказилган халқаро анжуманда дунёнинг кўп мамлакатларидан келган олимлар илмий маърузалари билан қатнашди.

XX асрнинг 30-йилларида бузиб ташланган мақбара ўрнида Ўзбекистон Республикаси Биринчи Президенти Ислом Каримовнинг ташаббуси билан қайтадан меъморий мажмуа бунёд этилди. Унинг марказида олимнинг мақбараси қад ростлади. Уни барпо этишда ўзбек миллий меъморчилик мактабининг илғор анъаналари қўлланди.

Муқаддас қадамжолар

-2003 йили Абдулхолиқ Ғиждувоний таваллудининг 900 йиллиги кенг нишонланди.  Ўзбекистон Республикаси Биринчи Раҳбари Ислом Каримов ташаббуси билан юбилей арафасида мажмуа янгитдан қурилди ва катта ободонлаштириш ишлари амалга оширилиб, бу ер муқаддас зиёратгоҳга айлантирилди.

-Яқин ўтмишда Ҳазрати Имом мажмуаси  анчагина эътиборсиз қолган эди. 2007 йили Биринчи Президентимиз раҳнамолигида мажмуа буткул реконструция қилиниб, асл қиёфаси тикланди ва қўшимча иншоотлар эса бу ерда сақланиб қолган биноларга мослаштириб қурилди.

-2008 йили Ислом Каримов сайъи ҳаракатлари билан Бухородаги хожагон тариқатининг олтинчи ҳалқасидаги пири комил Саййид Амир Кулол хоки ётган ер аниқланди ва унинг атрофида 6 гектарли маданий-меъморий мажмуа барпо этилди.

Соғлом жамият сари

Биринчи Президентимизнинг 2014 йил 1 августдаги “2014 — 2018 йилларда Ўзбекистонда аҳолининг репродуктив саломатлигини янада мустаҳкамлаш, оналар, болалар ва ўсмирлар соғлиғини муҳофаза қилиш борасидаги Давлат дастури тўғрисида”ги қарори ушбу соҳадаги тиббий ёрдам кўрсатаётган тиббиёт муассасаларининг моддий-техника базаси ва кадрлар салоҳиятини кучайтириш, замонавий ташхис усулларини жорий этиш, аёллар, болалар ва ўсмирлар касалликларининг олдини олиш ва даволашга йўналтирилган ишларни янги босқичга кўтарди.

Истиқлол солномасидан:

Ҳамма нарса, ҳатто, кўкда учган қуш ҳам «колхозники» бўлган тўқсонинчи йиллардаги оғир ва мураккаб бир шароитда Президентимиз ташаббуси билан 2,5 миллион оилага қарийб 700 минг гектар суғориладиган ер томорқа сифатида хусусий мулк қилиб берилди. Бугун ана шу томорқа ерлари халқимизнинг  асосий даромад манбаига айланди. Аҳоли даромадининг ярмидан кўпи биринчи навбатда тадбиркорлик, кичик ва хусусий бизнес ҳисобидан шаклланаётгани, уларнинг аксарияти эса бу ишни хонадонида, томорқасида ташкил этгани ҳам истиқлол  берган неъмат-эгалик ҳуқуқи натижаси.

9 май-Хотира ва қадрлаш куни

Биринчи Президентимиз Ислом Каримов ташаббуси билан 9 майнинг мамлакатимизда умумхалқ байрами – Хотира ва қадрлаш куни деб номлангани, Иккинчи жаҳон урушида ҳалок бўлган юртдошларимиз шарафига пойтахтимизда, вилоят ва туманлар марказларида Хотира майдонлари ташкил этилиши бу борадаги саъй- ҳаракатлар давлатимиз сиёсатининг муҳим йўналишларидан эканини яққол ифода этди. Бугунги кунда ушбу майдонлар халқимизнинг муқаддас қадамжолари сифатида доим зиёратчилар билан гавжум. Бу ердаги хотира китобларида номи битилган мард ва жасур юртдошларимиз ёд этилади.